នាព្រឹកថ្ងៃសៅរ៍ ទី១៧ ខែឧសភា ឆ្នាំ២០២៥ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃព្រឹទ្ធសភា (គណៈកម្មការទី៣) និងជាប្រធានក្រុមសមាជិកព្រឹទ្ធសភាប្រចាំភូមិភាគទី៧ និងលោកជំទាវ ម៉ែន ស៊ុន ម៉ុង ឫទ្ធី បានអញ្ជើញជាអធិបតីក្នុងពិធី ដំណើរទស្សនកិច្ច និងដាំកូនឈើ នៃសាកលវិទ្យាល័យ ប៊ែលធី អន្តរជាតិ នៅតំបន់រមណីដ្ឋានអភិវឌ្ឍន៍ កសិ-ទេសចរណ៍ ម៉ុង ប្ញទ្ធី សែនជ័យ ស្ថិតក្នុងភូមិមហាលំពាំងទី២ ឃុំសែនដី ស្រុកសំរោងទង ខេត្តកំពង់ស្ពឺ។
អង្គពិធី ប្រព្រឹត្តទៅដោយមានការអញ្ជើញចូលរួមពីឯកឧត្តមសន្តិបណ្ឌិត ឡូយ សុផាត ប្រធានគណៈកម្មការទី៣ នៃរដ្ឋសភា លោកជំទាវ ថាក់ ឡានី និងឯកឧត្តម សាយ បូរិន សមាជិកក្រុមសមាជិកព្រឹទ្ធសភាប្រចាំភូមិភាគទី៧ ឯកឧត្តមបណ្ឌិត លី ឆេង តំណាងរាស្រ្តមណ្ឌលរាជធានីភ្នំពេញ និងជាអគ្គនាយក ប៊ែលធីគ្រុប មន្ត្រីការិយាល័យក្រុមភូមិភាគទី៧ និងមន្ត្រីជំនួយការគណៈកម្មការទី៣ ព្រមទាំងថ្នាក់ដឹកនាំ និងនិស្សិតនៃសាកលវិទ្យាល័យ ប៊ែលធី អន្តរជាតិ សរុបចំនួន៥០០នាក់។
ពិធីដំណើរទស្សនកិច្ច និងដាំកូនឈើនាថ្ងៃនេះ រៀបចំឡើងក្នុងគោលបំណង៖ សិក្សាស្វែងយល់ពីតំបន់កសិ-ទេសចរណ៍ និងការចូលរួមដាំកូនឈើចំនួន ៣០,០០០ដេីម (ជាគម្រោងដាំក្នុងឆ្នាំ២០២៥នេះ) ដើម្បីជាការចូលរួមចំណែកជាមួយរាជរដ្ឋាភិបាលក្នុងការការពារបរិស្ថាន និងបម្រែបម្រួលអាកាសធាតុផងដែរ…។
ប្រភព៖ នាយកដ្ឋានព័ត៌មាន
